BAGUIO CITY–Impanamnama ni Department of Transportation Cordillera (DOTr-CAR) Assistant Regional Director Mohammed Naser Abbas nga agsubli daytoy iti posisyon ita nga aldaw.
Daytoy ket kalpasan ti 90 nga aldaw a pannakasuspindir ti opisial gapu iti nagbalin a parikot iti nagbaetanda ken ni sigud DOTr-Cordillera Regional Director Atty. Eduardo Natividad.
Sigun ken Abbas, naituding nga agsabatda ita nga aldaw iti baro a OIC-Regional Director ti ahensia a ni Engr. Robert Allan Santiago.
Impasigurado ni Abbas a makitinnulong daytoy ken ni Santiago para iti pagsayaatan ti sektor ti transportasion iti rehion.
Mamati daytoy nga agbalin a nasaysayaat ti panagtinnulongda ken ni Santiago no idilig iti nagbalin a kapadasanda ken ni Natividad.
Dinakamat pay ni Abbas nga iti panagsublina ket ad-adda nga irtenganna ti implementasion ti nagduduma a programa a rinugianna.
Kabayatanna, nagkedked ni Abbas nga agkomento no ania ti napamasak ken ni Natividad, no makasubli pay daytoy iti DOTr-Cordillera wenno saanen.
