BAGUIO CITY–Nakemmegen ti dua a babai a suspek a nanggandat a mangpapatay ken nangibelleng iti kadwada a menor de edad iti rangkis sadiay Pitpitan, Bayabas, Sablan, Benguet.
Nabigbig dagiti suspek a da Thalia Galvan, 18 anyos, Grade 11 student ken residente ti San Fernando, La Union ken ni Dianne Saraquin, 20 anyos ken residente ti San Juan, La Union.
Kabayatanna, agtawen met ti biktima iti 16, tubo ti Caba, La Union, ken residente ti Sevilla, San Fernado City, La Union.
Sigun kenni PSupt. Radino Belly, dadaulo ti Investigion Branch ti Benguet PPO, nakemmeg dagitoy iti pagtaengan ti maysa kadagiti suspek.
Kinunana nga impagarop dagiti suspek a pimmusayen ti biktima ngem nakalasat daytoy agingga a nakita ti maysa kadagiti residente iti nasao a lugar.
Kinunana a maibasar iti salaysay ti biktima, inawis daytoy kadagiti suspek nga ag-joyridem wenno agpasyar.
Kinunana nga idi nakadanunda sadiay Sablan ket pinagtutulungan dagiti suspek ken ti dua pay a lalaki a dinangdangran ti biktima babaen iti dakkel a bato nga intupakda iti ulona ken imbellengda daytoy iti rangkis.
Nupay kasta, nagasat a nakapuot daytoy ken inkagumaanna agkaradap manipod iti rangkis.
Agtultuloy ti imbestigasion dagiti pulis iti motibo ti krimen ken panakasapol ti dua pay a lalaki a karaman iti insidente.
