BAGUIO CITY – Irekreklamo ti sumagmamano a residente ti P5 a kanayonan a plete kadagiti parapasahero a jeep nga agbibiahe iti Asin Hot Spring iti baet nga awan ti pammalubos ti maseknan nga ahensia ti gobyerno.
Iti panakiyuman ti Bombo Radyo, inlawlawag ti maysa nga opisyal ti asosasyon dagiti drivers ken operators ti nasao a ruta a ti kanayonan a P5 iti base fare ket resulta ti taripnong dagiti commuters, drivers ken operators.
Impettengna a mismo pay a dagiti commuters ti nangisingasing iti panakainayon ti nasao a gatad iti plete dagitoy ken ti nasao a sistema ti panagbayad ket adda iti trial period a nangrugi idi Lunes ken agleppas inton Biyernes.
Innayonna a nangina unay ti gastosda iti panangminitinirda kadagiti jeep idinto ta no agbiaheda paturong iti siudad ti Baguio iti malem tapnu agkarga kadagiti pasahero ket bassit wenno manmano ti karga dagitoy.
Sigun pay kenkuana, ar-aramiden dagiti drivers ken operators ti nagtulaganda a panangipaay dagitoy iti umno a serbisyo kasukat ti kanayonan a P5 a nagresulta iti kaawan ti panagpila iti paradaan dagitoy manipud iti Lunes.
Naamuan a provincial route ti biahe sadiay ken saksakupenna ti Kilometer 7 agingga Kilometer 16, partikular iti masakupan ti Tadiangan ken Nangalisan.
Dinakamatna pay a ti kanayonan a P5 iti plete ket internal arrangement dagiti commuters ken dagiti drivers ken operators bayat a maipaay latta ti kaskenan a diskwento dagiti estudyante, senior citizens ken dagiti persons with disability.
Mainaig iti isyu, makitaripnong ti asosasyon dagiti jeepney drivers ken operators nga agbibiahe ti Asin Hot Spring kenni Department of Transportation (DOTr) – Cordillera Regional Director Robert Allan Santiago inton sumaruno a lawas.
Kinuna ti opisyal ti asosasyon dagiti drivers ken operators ti nasao a ruta a nakayuman ti Bombo Radyo nga ammo ti nasao nga opisina ti planoda gaputa pinaka-ammuanna dagitoy ngem saan nga impaay ti opisina ti pammalubosda iti nasao nga addang.
Kinunana nga isimsimpana dagiti datus ken dokumento tapnu iparangna iti taripnongda iti sumaruno a lawas.
Inyunay-unayna a ti addangda ket para iti pagsayaatan dagiti amin a maseknan sadiay nangruna ta adda met ti nakapila a kiddaw a mapagbalin a P14.50 ti minimum fare sadiay.
Innayonna a nabagaan dagitoy iti posible a panakaipataw ti sanction kadakuada gapu iti nasao a banag ngem agtalek daytoy a ti sanction ket maibasar iti agdama a dokumento nga iggem dagitoy.
Kabayatanna, aw-awisenna amin a driver, operators ken commuters ti ruta ti Asin Hot Spring tapnu dumar-ayda iti taripnong dagitoy inton Sabado, iti alas singko ti malem iti Barangay Hall ti Tadiangan tapnu pagsaritaanda manen ti nasao a pakaseknan.
