BAGUIO CITY – Kidkiddawen ti Office of the Civil Defense (OCD) – Cordillera ti panangisayangkat dagiti local government units (LGUs) iti entero a rehiyon iti bukodda nga earthquake drill.
Iti panakiyuman ti Bombo Radyo, kinuna ni OCD-Cordillera information officer Cyr Bagayao a daytoy ket tapnu adalenda ti agbalin nga addangda iti kanito nga adda ti gingined a dumayeg iti masakupanda.
Kinunana a ti panangipatungpal dagiti LGUs iti bukodda nga assessment ket maysa a wagas tapno maobserbaranda dagiti pagkurkuranganda iti tay-ak ti panagrescue, kaadda dagiti pasilidad ken equipment nga aramaten dagitoy ken dadduma pay.
Innayonna a mabalin met nga iyuman dagiti LGUs kadagiti maseknan nga ahensia ken opisina dagiti naduktalanada a parikut tapnu mapagtitinnulongan ti panakarisut dagitoy.
