BAGUIO CITY – Aglukat manen inton Lunes, March 30 ti Benguet Congressional Office ni ACT-CIS Representative ken ita ket Benguet Caretaker Congressman Eric Go Yap.
Inwaragawag daytoy ni Anthony Kuan, Head Coordinator ti nasao nga opisina kasaruno ti pananglawlawag ti Department of Health (DOH) a COVID-19 free wenno negatibo manipud iti nasao a virus ti kongresista.
Inruar ti DOH ti statement daytoy iti publiko ken ni Rep. Yap idi kalman ken ditoy nga inaklonda nga adda ti napasamak nga encoding error a resulta ti clerical oversight.
Kinuna pay ti ahensia nga isolated ti napasamak iti kaso ni Yap ken inkarida ti saanen daytoy a panakapasamak manen.
Maipalagip a kalpasan nga inaklon ni Yap a positibo daytoy iti COVID-19 kas maibasar iti feedback kenkuana ti DOH ket naipasidong met iti physical quarantine ken nairikep ti Congressman’s Office ti mammanday linteg a masarakan sadiay La Trinidad, Benguet.
Nadutukan ni Yap kas caretaker congressman ti Benguet kasaruno ti ipupusay daydi Representative Nestor Fongwan Sr. idi Disyembre 2019 gapu iti sakit.
Kabayatanna, iti interview ti Bombo Radyo Baguio kenni Yap, linawlawaganna nga idi pay January 28 ti naudi a close contact iti nagbaetanda kadagiti staff ti opisinana ditoy Benguet.
Kagiddan iti daytoy, impanamnamana ti agtultuloy a tulong ti opisinana kadagiti umili ti probinsia gaputa inton sumaruno a lawas ket sumangpeten dagiti personal protective equipment nga idonarna para kadagiti medical frontliners iti Benguet General Hospital ken dagiti bitamina nga idalanna kadagiti 13 a mayor a maiwaras kadagiti senior citizens iti Benguet.
