BAGUIO CITY – Naangay ti kaunaan a virtual Cordillera Fun Facts Quiz para kadagiti agtutubo ditoy rehiyon Cordillera kabayatan iti panakarambak ti maika-33 a Founding Anniversary ti Cordillera Administrative Region (CAR).
Indauluan daytoy ti Outstanding Students of the Cordillera Administrative Region (OSCAR) Alumni Community Incorporated ken ti Sangguniang Kabataan Federation ken Local Youth Development Office ti La Trinidad, Benguet.
Sigun kenni Adrian Fernandez, presidente ti OSCAR Alumni Community Incorporated, babaen iti nasao nga aktibidad ket nakatulongda iti panakaipreserba ti nabaknang a kultura ti rehiyon.
Kinunana a nagsentro dagiti saludsod iti quiz dagiti nagduduma nga impormasyon, paspasamak ken dagiti banwar iti pakasaritaan ti Cordillera.
Innayonna a dimmanon iti 10 nga agtutubo ti nakipaset iti quiz ken manipud kadagitoy ket nagkampeon ni Jayvee Moltio a nakaawat ti P2,000 a premyo bayat a first runner-up ni Nicholai Fanged a nakaawat ti P1,500 a premyo ken second runner-up ni Tessie Grail Lomas-e a nakaawat met ti P1,000 a premyo.
Naipaayan pay dagitoy iti e-certificates manipod kadagiti organizers ti nasao nga aktibidad.
