BAGUIO CITY – Naipasidong iti lockdown ti mays a bunkhouse sadiay Virac, Itogon, Benguet kalpasan a nagpositibo iti COVID-19 ti 55 a minero nga agnanaed iti nasao a pasdek.
Pakabuklan a 200 a minero ken pamilya dagitoy ket manarimaan a naka-quarantine iti nai-lockdown a Carpentry Bunkhouse.
Sigun kenni Governor Melchor Diclas, pinagbalin a quarantine wenno isolation facility ti bunkhouse bayat nga agbirbirukda ti wagas tapnu manayonan dagiti quarantine facilities sadiay.
Nupay kasta, impanamnamana a maipatpatungpal iti pasdek dagiti paglintegan ken pagalagadan a masursurot kadagiti positibo a kaso ti COVID-19.
Linawlawaganna met nga amin a positibo a kaso ket naiturongda iti maikatlo ken maikapat a kadsaaran ti pasdek bayat a dagiti asymptomatic ket iti umuna ken maikadua a kadsaaran.
Naipasigurado pay ti panakaipaay ti food packs kadagiti naka-quarantine a pamilya bayat nga agtultuloy ti extensive contact tracing ken expanded risk-based testing kadagiti mining communities ken bunk houses sadiay Itogon, Benguet.
