BAGUIO CITY – Nakasagana ti DSWD-Cordillera a mangipatulod ti kanayonan a family food packs kadagiti lokal a gobyerno iti rehion Cordillera nga agkiddaw iti daytoy para kadagiti pamilya a naapektaran iti panagdalapos ti bagyo nga Ulysses.
Iti interview ti Bombo Radyo Baguio, kinuna ni regional director Leo Quintilla nga idi kalman ket nagipatuloddan ti food packs sadiay Kalinga.
Dinakamatna pay nga agtultuloy ti panagwanawanda iti nagbalin nga epekto ti bagyo ditoy rehion, pakairamanan dagiti naapektaran ken nagbakwit a pamilya.
Maibasar iti kaudian a datus ti DSWD-Cordillera, 334 a pamilya a bukbuklen ti 1,265 nga indibidual ti naapektaran iti bagyo ken dagitoy ket masarakan iti 91 a barangay iti 28 a munisipyo ti lima a probinsia iti rehion.
Nagkamang met ti 86 a pamilya a bukbuklen ti 338 nga indibidual iti 10 nga evacuation centers iti rehion bayat a 150 a pamilya a bukbuklen ti 563 nga indibidual ti nagkamang kadagiti kabagian wenno pagayamda.
Malaksid iti daytoy ket dua a balay iti rehion ti naan-anay a nadadael bayat a 66 ti nakapasar ti dadael.
Mangnamnama pay ti DSWD-Cordillera a napartak ti panakaipaluspos ti pondo a maited kadagiti nadadaelan ti balay gapu iti bagyo nga Ulysses.
