BAGUIO CITY – Pinadayawan ti Police Regional Office Cordillera (PROCOR) dagiti first responders, rescuers ken dagiti ‘silent heroes’ nga awanan sarday nga agtatrabaho tapnu mabirukan dagiti biktima ti dakkel a panagreggaay sadiay Viewpoint, Banaue, Ifugao.
Sigun kenni PROCOR regional director PBGen. R’Win Pagkalinawan, nasken a saan met a lipatan dagiti silent heroes nga agtatrabaho iti ‘behind the scene’, no sadino, dagitoy ket dagiti fur heroes manipud iti nagduduma a K-9 units ti pulisya.
Dinakamatna a na-deploy sadiay Banaue dagiti uppat nga aso nga addaan breed a Belgian Malinois pakairamanan dagiti handlers dagitoy tapnu tumulong iti search and retrieval operation.
Immuna a nai-deploy da da Jackson, Penny ken Idol ket manipud iti Explosive and Ordnance Division ti Ifugao PNP, iti K-9 Unit ken iti Ifugao Provincial Mobile Force Company.
Manarimaan met ita ti kaadda ni Panther manipud iti Ifugao Provincial Mobile Force Company sadiay Banaue tapnu tumulong iti panakabiruk ti kakaisuna a nabati a biktima.
Inyunay-unay pay ni Pagkalinawan a saan laeng a ‘man’s best friend’ ti aso ngem ketdi, partners pay dagitoy dagiti panakabagi ti linteg iti nagduduma nga operasyon kas iti tracking, drug and bomb detection ken iti search and rescue iti panawen ti kalamidad.
