BAGUIO CITY – Nakemmeg ti maysa a senior citizen gapu iti maatap a panangtakawna iti maysa nga ultrasound machine manipud iti maysa a klinika sadiay Upper Session Road, Baguio City.
Nabigbig daytoy a ni Jhonn Santos Daquioag, 62-anyos, self-employed ken residente ti General Luna Street, Tuguegarao City.
Maibasar iti report ti Baguio City Police Office (BCPO) – Station 7, nadiskobre ti panakatakaw ti nasao a makina nga aggatad ti P1.3-M iti agsapa ti November 16 manipud iti maysa a law office and ultrasound clinic sadiay Upper Session Road.
Naduktalan kabayatan ti imbestigasyon a mailaklako iti online ti nasao a makina.
Kalpasan ti nainget a case build-up ket nagturong dagiti operatiba ti BCPO-Station 7 sadiay Santa Cruz, Manila para iti panakaisayangkat ti entrapment operation iti uneg ti maysa a hotel idi kalman.
Nagresulta ti operasyon iti panakakemmeg ni Daquioag ken nakumpiskar iti ikotna ti natakaw nga ultrasound machine.
Naipila metten ti kaso a panaglabsing iti Presidential Decree 1612 wenno Anti-Fencing Law kontra kenni Daquioag.
