BAGUIO CITY – Mamati ti dadaulo ti Police Regional Office Cordillera (PROCOR) a dagiti laeng tribu ti Bugnay sadiay Tinglayan, Kalinga ken Betwagan sadiay Sadanga, Mountain Province ti makarisut iti isyu iti pagin-inagawanda a daga.
Komento daytoy ni Police Brigadier General R’Win Pagkalinawan kasaruno ti inspeksion nga insayangkat ti PROCOR, tribal representatives ti Bugnay ken Betwagan ken dagiti maseknan nga ahensia ti gobyerno iti tapaw ti Mount Ikar a pakasarakan ti disputed boundaries ti dua a barangay.
Sigun kenkuana, kabayatan ti inspeksion ket imparang dagiti taga-Betwagan dagiti datus ken argumento dagitoy a naibasar iti historical facts bayat nga awan ti naiparang dagiti taga-Bugnay a kapada a pammaneknek.
Kinunana a ti basaran dagiti taga-Bugnay ket ti cadastral map nga inaramid ti DENR nupay inaklon ti DENR a ti intedda a dokumento ket saan a pinal wenno opisyal ken inkabilda latta a disputed area ti nasao a disso
Gapu iti daytoy, kinunana a saan a third party ti mangrisut iti boundary dispute ti dua a barangay ngem kitdi, mismo a dagitoy babaen kadagiti nainsigudan a tradisyon iti Cordilleras a maidalan iti ritwal ken nalawag a saritaan.
Nupay kasta, nakaala latta dagitoy iti impormasyon a mabalin a maaramat iti panakabukel dagiti baro a pamuspusan tapnu maragpat ti agnanayon a kappia iti nagbaetan ti Betwagan ken Bugnay.
Agtaltalinaed met ti presensia dagiti pulis iti mapagin-inagawan a disso tapnu maipanamnama nga awan ti mapasamak manen a panagbara ken panagdinnangran iti nagbaetan ti dua a tribu.
