BAGUIO CITY – Nasarakan ti bangkay ti kaipaspasngay a maladaga iti igid ti kalsada sadiay Murmuray, Laya East, Tabuk City, Kalinga idi agsapa.
Maibasar iti imbestigasyon ti Tabuk City Police Station, nasarakan ti bagi ti maladaga kabayatan ti clean-up drive dagiti barangay officials iti nasao a disso.
Nasarakan ti bangkay idi inlukat ni Laya East Barangay Kagawad Wilson Culalong ti maysa a sako ti basura tapnu kuma isimpana dagiti linaon daytoy.
Naamuan a nakakabil ti bangkay ti maladaga iti nalabbaga a bag a nainayon kadagiti linaon ti nasao a sako.
Maibasar met iti salaysay ti maysa a testigo, nakitana ti maysa a babai a nakasuot ti bathrobe a mangitaltali ti sako iti pagbasuraan sadiay idi rabii ti Martes ngem saanna a mairupaan daytoy gapu iti kinasipnget ti nasao a disso.
Naisayangkat ti panagkararag iti nakasarakan iti bagi ti maladaga sakbay a naiturong daytoy iti kamposanto para iti panakaitabon ti maladaga.
Kidkiddawen met ti pulisya ti tulong dagiti maseknan nga addaan impormasyon iti nasao nga insidente.
