BAGUIO CITY – Mangnamnama latta dagiti strawberry growers ken dagiti dadduma a mannalon iti nalatak nga Strawberry Farm sadiay La Trinidad, Benguet nga adda dagiti turista a maallukoy nga agturong sadiay kalpasan a nailukat daytoy para iti strawberry picking.
Sigun kadagiti strawberry growers, P450 ti bayadan ti tunggal indibidual nga agburas iti strawberry ken agingga laeng iti maysa a kilo ti strawberry ti mabalin a burasen ti tunggal indibidual.
Naamuan a sakbay met a makastrek iti pagburasan ti maysa nga indibidual ket nasken nga agpalista daytoy para iti contact tracing record, agala iti temperatura ken agaramat iti sanitizer.
Limitado metlang ti bilang dagiti mabalin a sumrek iti maysa a pagburasan tapnu masurot ti umno a physical distancing.
Masursurot metlaeng ti pagaladagan a saan a mabalin a sumrek iti pagburasan ti saan nga agburas ken dagitoy ket nainget nga iwanwan dagiti mismo mannalon.
Imbinglay pay dagiti mannalon sadiay a malaksid kadagiti strawberry ket adda metlaeng dagiti nateng a magatang sadiay nangruna ta sumagmamano kadagiti strawberry growers ket nagmula iti nateng.
