BAGUIO CITY – Imbinsa-binsa ti Regional Explosive Ordnance Disposal and Canine Unit Cordillera (RECU COR) dagiti obligasyonda iti rehiyon Cordillera.
Iti panakiuman ti Bombo Radyo Baguio, kinuna ni Police Executive Master Sergeant Ceasar Cattiling, Master EOD Technician ti RECU COR a bukbuklen ti 103 personnel ken 23 K-9 dogs ti opisina dagitoy.
Imbinglayna a trabahoda ti mangrekober kadagiti nabayagen a bomba wenno dagiti unexploded explosive ordnance a saan a pimmutok wenno naaramat idi World War II babaen kadagiti explosive dogs.
Dinakamatna a dumanonen iti 500 pounds a bomba ti narekoberda iti nagduduma a paset ti Cordillera ngem inturongda sadiay Capas, Tarlac nga agserserbi kas blasting area wenno pagpaputukan kadagiti narekober a bomba.
Inayonna nga akkemda metlaeng ti mangrekober kadagiti saan a nausar nga explosive remnants of war ken improvised explosive devices a naimuntar iti dadakkel nga establishemento a kadawyan a pagturturongan dagiti addo a tattao.
Malaksid iti dayta, impetteng ni Cattiling a tumultulong metlaeng dagitoy a mangbigbig ken mangbirok kadagiti mapukpukaw nga indibidual a biktima ti kalamidad wenno kriminalidad pakairaman dagiti suspek babaen iti tracking dogs.
Impannakkelna pay a nakatulong metlaeng dagiti narcotic dogs iti panakarekober dagiti marijuana pakairamanan dagiti cultivator partikular sadiay Tublay ken La Trinidad, Benguet.
Gapu iti daytoy, al-alukoyenna ti publiko a dagus nga iyumanda iti opisina ti RECU COR dagiti paseknanda a karaman kadagiti nabinsa-binsa nga kampanya ken programa dagitoy.
