BAGUIO CITY – Natiliw ti dua nga indibidual iti entrapment operation nga insayangkat dagiti otoridad sadiay Gibraltar Road, Baguio City idi kalman.
Nabigbig dagitoy a da Raymel Kit Javrigue, 30-anyos, computer technician, residente ti Hillside, Baguio City ken ni Antonio Viray, 57-anyos, jeepney driver, residente iti Gabriela Silang, Baguio City.
Maibasar iti report, nakita ti maysa a pulis ti impablaak ni Javrigue iti social media nga ilaklakona a troso ti Benguet Pine Tree idi kanikadua iti rabii.
Gapu iti daytoy, dagus a nangipatulod ti nasao a pulis iti text message a kayatna a gumatang iti troso nga ilaklako ni Javrigue ken nagtulagda nga itulod ti suspek dagiti troso sadiay Gibraltar idi malem kalman.
Kagiddan iti panangideliver dagiti suspek kadagiti troso ket insayangkat metten dagiti pulis ti entrapment operation ken sadiay a pinarada ti jeep a nangiluganan dagiti suspek kadagiti troso.
Natiliw dagiti suspek kalpasan a napaayda a mangiparang ti umno a dokumento dagiti troso nga ilaklako dagitoy.
Naipaiman iti DENR dagiti nakumpiskar a troso nga aggatad ti nasurok O3,000 bayat a sumangsangon dagiti dua iti kaso nga iligal a panagpukan ti kayo.
