Maysa nga high value drug personality, natiliw iti buy-bust operation sadiay Buguias, Benguet; nasurok P56-K a gatad ti maatap a shabu, nakumpiskar

BAGUIO CITY – Natiliw ti maysa a high value drug personality iti buy-bust operation nga insayangkat dagiti otoridad sadiay Wallayan, Poblacion, Buguias, Benguet itay laeng nabiit.

Nabigbig daytoy a ni Ronyeen Igualdo alyas Caba, 43-anyos, residente ti nasao a lugar ken reloaded kas High Value Individual.

Nakumpiskar kenkuana ti 10 a pakete ti maatap a shabu nga agdagsen ti mapattapatta a 8.32 grams ken aggatad ti mapattapatta a nasurok P56,000.

Narekober pay iti ikotna ti naaramat a buy-bust money bayat a nakumpiskar metlaeng ti cellphone nga inaramatna a nakitransaksion iti maysa kadagiti operatiba.

Iti agdama, sumangsango ni Igualdo iti kaso a panaglabsing iti RA 9165 wenno ti Comprehensive Dangerous Drugs Act of 2002.