BAGUIO CITY – Maaw-awis dagiti agtutubo ditoy Baguio City a makipaset kadagiti nagduduma nga aktibidad ti lokal a gobierno kagiddan ti pannakarambak ti Linggo ng Kabataan.
Sigun kenni Committee on Youth Welfare and Sports Development head ken Councilor Levy Lloyd Braza Orcales, adda iti nabukel a linteg para iti tinawen a pannakarambak ti Linggo ng Kabataan ken agbayag daytoy agingga iti ngudo ti agdama a bulan.
Kinunana nga ado dagiti aktibidad nga insagana dagitoy para kadagiti agtutubo kas iti sports events partikular dagiti online games ken non combat sports, webinars babaen iti zoom, talent events babaen iti online ken dadduma pay.
Dinakamatna a nakalukat dagiti nadakamat nga aktibidad kadagiti interesado a makipaset nga agtawen iti 15 agingga 30.
Innayunna a mabalin nga agrehistro iti official facebook page ti SK Baguio City tapnu maliklikan iti panagturong dagitoy iti opisinada ken maipasigurado metlang iti kinatalged dagiti makipaset iti daytoy iti COVID19.
Kabayatana, mangipatungpal ti Sangguniang Kabataan ti Search for 10 outstanding youth leaders ken organizations ditoy Baguio City.
Inlawlawag ni Orcales nga adda ti ordinansa ti siudad a mangirekrekomendar iti pannakabukel ti maysa a programa para iti pannakabigbig dagiti aktibo nga agtutubo ken organisasyon ditoy siudad.
Kinunana a dagiti mapagasatan a mapili ket maipaayan iti pammabigbig kadagiti culminating activities ti Linggo ng Kabataan.
