BAGUIO CITY- Dumanonen iti sangapulo a baro nga integrated a pagadalan ti naibangon iti nagduduma a paset ti probinsia ti Benguet bayat a siyam nga high school annexes ti nagbalinen nga independent a pagadalan.
Karaman kadagiti integrated schools a mangidiaya iti kompleto a basic education manipud kindergarten agingga grade 10 ken grade 12 ti Abucot Integrated School (IS) ken Ballay IS sadiay Kabayan ken Boneng IS sadiay Naguey, Atok.
Karaman pay ditoy ti Lengaoan-Waking IS sadiay Buguias; Lubo IS sadiay Kibungan; Gumatdang IS sadiay Itogon; Manganese IS sadiay Ampucao, Itogon; Mocgao IS sadiay Badeo, Kibungan; Mogao IS sadiay Balili, Mankayan; ken Taba-ao IS sadiay Taba-ao, Kapangan.
Nagbalin metten nga independent national high schools ti Kayapa NHS sadiay Bakun; Sinacbat NHS sadiay Bakun; Cabacab NHS sadiay Mankayan; Alno , Puguis, ken Bineng NHS sadiay La Trinidad; Ambangeg ken Ambuklao NHS sadiay Bokod ; ken Marcelo Marquez NHS sadiay Tuba, Benguet.
Sigun iti Department of Education-Benguet, ti panakibangon ti kanayonan nga integrated ken independent schools ket mandato ti ahensia tapno mapalawa pay ti serbisyo dagitoy iti edukasion kadagiti ubbing nupay adda ita iti baro a wagas ti panagadal dagiti estudyante.
