BAGUIO CITY – Maiyap-apela ti panangsuportar ti publiko kadagiti negosyante iti lokalidad ken kadagiti mannalon iti maisayangkat nga Strawberry Festival ti La Trinidad, Benguet.
Sigun kenni Municipal Tourism Officer Valred Olsim, babaen daytoy iti panaggatang kadagiti produkto dagiti nasao a negosyante ken mannalon.
Iimpettengna a babaen iti panagsisinnuportar ket agpapada a dumur-as ti tunggal umili.
Inyapelana ti nasao a banag kagiddan ti panagsagana pay dagiti baro ken siguden a tourist attractions ti ili.
Mangnamnamada met nga iti kaadu dagiti turista ti Baguio ket mainayon a turongen dagitoy ti La Trinidad ken dadduma nga asideg a munisipyo ti Benguet.
Inyunay-unayna a kasapulan unay ti nasao a development iti sektor ti turismo gaputa maysa ti sektor ti turismo kadagiti kangrunaan a naapektaran iti agtallo-tawen a pandemya.
Impettengna a ti turismo ti maysa kadagiti mangpataray iti ekonomiya ti maysa a pagilian isut gapuna a nasken nga adda dagiti maaramid nga addang tapnu maisubli ti panagdur-as daytoy a giddanan ti panagdur-as ti pagbiagan ken empleyo.
Impannakkel pay ni Olsim a kabayatan ti pandemya ket adu dagiti nangpabalin a pagpasyaran ti pagmulaan dagitoy a nakatulong iti panagnayon ti mapaspastrekanda.
Dinakamatna a ti numero uno a kita ti turismo sadiay La Trinidad ket ti agro-tourism.
Sigun kenkuana, saan laeng a nakapataud iti agricultural products dagiti agro-tourism sites ngem ketdi, naaddaan pay ti munisipyo kadagiti maipampannakkel a tourism destination.
