BAGUIO CITY – Bumabbaba ti bilang dagiti indibidual nga agsapsapol ti antigen self-test kits tunggal lawas ditoy Baguio City.
Iti datus ti City Health Services Office (CHSO) manipod Pebrero 7 agingga 11 ket nailista ti 67 antigen self-tests a naipaay kadagiti agkasapulan nu sadinno dumanon laeng iti 1.49% ti positivity rate wenno maysa laeng ti positibo ti resulta daytoy.
Immunan nga dimmanon iti 99 ti naggatang nga self-test manipod Enero 31 agingga Pebrero 4 nu sadinno 12 kadagitoy ti nangipatungpal iti self-swab ken 85 dagiti na-swab babaen ti on-site bayat nga 2 nga test kits ti naisubli.
Manipod met iti 175 test kits a naipaay idi Enero 24 agingga 28 ket 119 ti impatungpal dagiti health workers, 23 dagiti nag-self swab ken 33 dagiti naisubli.
Manipod iti 142 a pakabuklan nga antigen self test nga impaay ti nasao nga ahensia ket 33.8% laeng ti positivity wenno 48 laeng ti nagpositibo ti resulta dagitoy.
Sigun kenni Mayor Benjamin Magalong, mangipakpakita ti nababa a pagkasapulan ti testing iti nababa met a bilang dagiti symptomatic nga indibidual nga agkasapulan iti testing ken mangipakpakita iti panagbaba ti kaso ti COVID-19.
Maipalagip a naiyuswat ti pilot ti panagaramat ti self test kits ditoy siudad iti sumagmanano nga distrito tapnu nalaklaka a magatang dagiti test kits ken nalaklaka met a mabigbig dagiti posible nga naka-imet iti virus.
