Baguio City – Agarup 898 nga examinees ti nakipaset iti National Police Commission (NAPOLCOM) Entrance Examination iti Baguio Central School idi kalman, Disyembre 3.
Sigun kenni Editha Puddoc, Regional Director ti NAPOLCOM – Cordillera, nagtaud dagiti examinees manipud Regions 1, 2, 3, NCR ken Caraga.
Nangrugi ti eksaminasyon, alas otso ti agsapa agingga alas onse ti agsapa.
Sakbay a nakastrek dagiti examinees ket impakitada pay dagiti sumagmamano a requirements kas ti notice of admission ken vaccination card.
Naiparit ti panangitugot dagiti examinees ti aniaman a banag iti exam center malaksid laeng kadagiti nadakamat a requirements.
Awan met ti nadiskwalipikar iti nasao nga eksaminasyon.
Manamnama a maamoan ti resulta kalpasan ti uppat a pulo ket lima agingga innem a pulo nga aldaw.
Maipatulod ti resulta babaen iti mail ken maipablaak metlaeng iti website ti NAPOLCOM.
Kabayatanna, agarup sangagasut dua pulo ket lima a uniformed personnel ti makipaset iti promotional examination ita nga aldaw, Disyembre 4.//TomJaravata
