BAGUIO CITY – Tiniliw dagiti operatiba ti Baguio City Police Office City Intelligence Unit (CIU) ti notorious carnapper ken narekober kenkuana ti tinakawna nga sports utility vehicle (SUV) sadiay Lake Drive, Baguio City itay nabiit.
Ti lalaki a suspek ket agtawen iti 24, nabigbig kas notorious gapu iti “rent-tangay” a modus-na iti nagduduma a paset ti Luzon partikular sadiay Metro Manila, Pampanga, Pangasinan, Laguna, ken dadduma.
Nagaramat daytoy ti sumagmamano ken bogus nga identification cards ken nagan.
Sigun iti report, adda ti warrant of arrest nga impaulog ti Baguio City Regional Trial Court kontra iti suspek gapu iti kasona a carnapping nga addaan ti P200,000 a piyansa.
Kabayatan ti operasyon, sinukimat dagiti otoridad ti lugan nga inaramat ti suspek ken ditoy a naduktalan a sinukatanna ti plate number.
Naberipikar a ti SUV nga inaramat ti suspek ket karaman kadagiti naireport a lugan a natakaw idi Hulyo 25, 2022 sadiay La Trinidad, Benguet.
Naipaima ti nasao a lugan iti La Trinidad Municipal Police Station nu sadino sabali manen a kaso ti carnapping ti naipila kontra iti suspek.
Sumagmamano metlaeng a biktima ti “rent-tangay” ti nagturong iti opisina ti BCPO CIU tapno agipilada ti reklamo kontra iti suspek kalpasan a napaay daytoy a nangisubli kadagiti rinentaanna a lugan.
Iggem ita ti City Intelligence Unit ti suspek para iti umno a dokumentasyon ken disposisyon bayat a maisagsagana ti multiple charges kontra kenkuana gapu iti panaglabsingna iti RA 10883, wenno ti New Anti-Carnapping Act of 2016.
