Al-allukuyen ni Marivic Toyan Esnara, Business Councilor ti Negosyo Center-Tublay ken DTI-Baguio-Benguet representative iti nasao a munisipyo dagiti umili sadiay nga apan ag-request iti opisina dagitoy no adda man ti kasapulan dagitoy a livelihood trainings a mabalin nga ipaay ti ahensia.
Iti panakiuman ti Bombo Radyo kenkuana, kinunana a malaksid iti food processing a programa dagitoy, mabalinda met a mangipaay iti nagduduma a serbisio a kas ti shared service facility. Ipapaay dagitoy ti libre a pannakaaramat ti nasao a pasilidad.
Nupay kasta, apaman a mapaliiw wenno makita ti DTI a balligi ti panangaramat dagiti indibidwal iti pasilidad, mabalin nga ipaay ti DTI daytoy kadakuada.
Malaksid iti dayta, kinuna ni Esnara a mangipapayda metlaeng iti financial assistance.
Dinakamtna a mabalin a makitinnulong daytoy iti financing arm ti Department of Trade and Industry no ti parikut dagiti umili iti Tublay ket ti pinansial a kasapulan. //Bombo Genzel Depayso
