Impeksa ni Joyce Rillorta, Nurse V ti Department of Health – Cordillera a maysa kadagiti kangrunaan a rason nu apay a nangato ti bilang dagiti obese wenno nalabes ti kinalukmegna iti rehiyon ket gapu iti kultura a cañao.
Sigun kenni Rillorta, ti nalabes a pannangan ti karne a nalaokan ti asin wenno ti makunkuna a “watwat” ket mangitunda iti obesity.
Dinakamatna a nu adda ngamin ti agparti ti ayup ket saan laeng a maysa nga aldaw ti pannangan dagiti tattao iti karne nu di ket dumanon pay iti tallo nga aldaw.
Inlawlawag met ni Rillorta a saanna a kayat a saowen nga ikkaten ti kultura a cañao nu di ket imbalakadna a kontrolin dagiti ipapauneg a taraon nangruna ti karne.
Maibasar iti datos sipud idi December 2024, dumanon iti 70,613 nga agtawen iti 20 angingga 59 dagiti maibilbilang nga obese kasta met dagiti agtawen iti 60 agpangato a dumanon iti 20,551.
Kabayatanna, kagiddan ti selebrasyon ti World Obesity Day idi kalman, inyunay-unay ti nasao nga opisyal nga obserbaran ti healthy diet para iti
nasalun-at a pammagi.//Bombo Genzel Depayso
