Naituding a mainaguraran ti baro nga Irisan Multi-Purpose Building inton Marso baente uno.
Iti pannakiuman ti Bombo Radyo kenni Engr. Bonifacio Dela Peña -City Administrator, kinunana a mangrugi ti inagurasyon iti oras ti alas nuebe iti nasao nga aldaw.
Sigun kenkuana, naan-anayen a maaramat ti nasao a barangay hall rason a mabalinen a maaramat daytoy.
Ti nasao a multi-purpose building ket addaan iti dua a kadsaaran ken dua metlaeng a basements.
Kinuna ni Dela Peña, ita laeng a mainaguraran ti nasao a pasdek agsipud ta naitantan ti sigud nga schedule daytoy idi Marso katorse gapu iti availability ni Baguio City Mayor Benjamin Magalong ken dagiti dadduma pay a barangay officials.
Iti agdama, manarimaan paylaeng ti pannakaaramid dagiti comfort rooms ken dagiti division ti nasao a pasdek.
Nupay kasta, maur-uray paylaeng ti pannakatarimaan ti transformer a maaramat iti daytoy.
Kabayatanna, impetteng metlaeng ti nasao nga opisyal nga awan paylaeng ti plano dagitoy seknan iti sigud a barangay hall sadiay Irisan.
Iti baet dayta, kidkiddawen ni Dela Peña kadagiti maseknan nga opisyal sadiay ti panangsustinarda, ken umno a pannakaaramat ti nasao a barangay hall.
