Naiyawiden ti bangkay ti 34-anyos a lalaki a pimmusay iti aksidente idiay Line 10, Brgy. Ekip, Bokod, Benguet itay nabiit.
Nabigbig daytoy a ni Eugene Salatic Tanawe, mannalon, ken residente ti Nanchopit, Bashoy, Kabayan, Benguet.
Iti interview ti Bombo Radyo iti Bokod MPS, paturong ti biktima idiay Loo, Buguias, Benguet tapno sunduenna kuma ti asawana.
Nupay kasta, nakita laengen ti maysa a witness ti natnag a pick-up bayat a daldalyasatenna ti kalsada idiay Line 10, Brgy. Ekip, Bokod, Benguet.
Naduktalan a ti nakalugan iti daytoy ket ni Tanawe.
Ti nakatnagan ti lugan ti biktima ket addaan kauneg nga 8 metro.
Sigun pay iti Bokod MPS, posible a ti low visibility ti lugar ti maysa a rason iti napasamak nga insidente agsipud ta naangep ken agtudtudo idi napasamak ti aksidente.
Dagus met a naitaray ti biktima iti ospital ngem naideklara a pimmusay.
