Imbutaktak ti nakapagtalaw kadagiti otoridad a South Korean fugitive a nagbayad isuna iti P6 million iti maysa nga immigration officer ken maysa a police officer tapno mapasimple ti panaglibasna.
Daytoy ket kinuna ni Na Ikhyeon iti panagdenggeg ti Senate subcommittee on justice and human rights seknan iti panaglibas ni sigud a Bamban, Tarlac Mayor Alice Guo.
Kinuna ni Na a direkta a nakisarita isuna kenni Paul, a binigbigna ti bukodna a bagi kas maysa a high-ranking officer ti Bureau of Immigration; ken Raul, A nangiyam-ammo iti bagina kas polis tapno mapalaka ti panaglibasna iti pannakaibalud daytoy iti Bureau of Immigration.
Sigun met kenni BI Commissioner Joel Viado nga adda bayat ti panagdenggeg, kinunana a nakaawatda ti ladawan daggiti tattao a mapapati a ni Paul ken Raul, ngem pinaglibakanna a dagitoy ket kameng ti Bureau of Immigration.
Kinunana nga awan ti agnagan ti “Paul” a nangato ti posisionna iti nasao nga ahensia, ken awan ti naka-detailed a kameng ti Philippine National Police iti Bureau of Immigration.
Iti baet nga awan ti impormasionda kenni “Paul” ken “Raul”, kinuna ni Viado a naikkaten ken napilaandan ti criminal ken administratibo a reklamo kontra kadagiti tallo a kameng ti Bureau of Immigration a mapapati a timmulong tapno makalibas ti South Korean fugitive.
