Naisayangkat ti spot ken surprise inspection drug test kadagiti miembro ti Baguio City Police Office Police station 5 ken Police Station 10 ita nga sadiay Melvin Jones Grandstand.
Iti panakiuman ti Bombo Radyo kenni Police Major Marcy Marron – PIO ti BCPO, kinunana a dagiti Police station 5 ken 10 ti naipasidong iti drug test gapu ta daytoy ti pagtratrabahoan ti pulis a natiliw idi kalman kasta met a sadiay ti nakapasamakan ti buy bust operation.
Gapu iti nasao nga insidente, kinuna ni PMaj. Marron a manamnama ti mas adu a series ti surprise drug test ken seminars tapnu saan a maulit ti nasao nga insidente.
Nu pay kasta mangnamnama ti publiko nga awanen ti pulis iti syudad a maisangkot iti illegal a droga.
Kabayatanna, mauray pay ti resulta ti naisayangkat a drug test kadagiti pulis ita nga aldaw.
Ngem, kadagiti napalpalabas a drug test ket awan met ti nagpospositibo kadagitoy no sadino ti kaudian a drug testing kadagitoy ket idi Marso baente iti agdama a tawen.
Iti sabali a bangir, iti laksid nga umaw-awat ita iti panag-umsi wenno bashing ti Baguio City Police Office gapu iti panakairaman ti maysa a Police Executive Master Sergeant iti iligal a droga ket impasigurado ni PMaj. Marron nga agtuloy ti serbisyo dagitoy no sadino awan ti pilpilienda, siasinuman ti aglabsing iti linteg ket nasken a maaarestar.//Via Bombo Noveh Organo
