Manarimaan ti Oplan Baklas dagiti personnel iti Commission on Elections-Cordillera kaduada dagiti pulis, Local Government Units, ken partner agencies kadagiti campaign posters dagiti political aspirants iti intero a rehiyon kagiddan ti panagrugi ti local campaign period ita nga aldaw.
Iti pannakiuman ti Bombo Radyo kenni Atty. Julius Torres, Regional Director iti Commission on Elections-Cordillera, kinunana a dagiti ikkaten dagitoy ket dagiti saan nga umno a posters kas iti saan a simmurot iti umno a rukod ken dadduma pay.
Kagiddan dayta, nagpalagip daytoy kadagiti kandidato a rumbeng a suruten dagitoy dagiti pagalagadan ti Commission on Elections kas iti umno a rukod dagiti campaign materials, ti umno a pakaimuntaran ken dadduma pay.
Impettengna a mabalin a mangimuntar dagitoy iti campaign materials kadagiti private entities la ketdi nagpakada dagitoy.
Inyunay-unayna metlaeng a tratuin ken irespeto dagitoy ti tumunggal maysa bayat ti campaign period para iti naannayas ken nakappia nga election period.
Kabayatanna, bambantayan metten ti national ken local level ti vote-buying kasta metten ti panagabuso kadagiti sanikua ti gobierno.
Malaksid iti dayta, nagpalagip pay daytoy kadagiti government workers a liklikan nga agkampanya ken agtalinaed a patas.
