Impetteng ni Ma. Cynthia Coronel Abalos, Solo Parent ken VAWC Advocate a rumbeng a makassuan ti maysa a kandidato sadiay Pasig City a nagisawang iti saan nga umno a balikas seknan kadagiti solo parents.
Iti pannakiuman ti Bombo Radyo kenkuana, pananginsulto iti karbengan dagiti babbae ti insawangna ken awanan daytoy iti karbengan a mangisawang iti saan a nasayaat.
Kinunana pay nga awanan daytoy iti karbengan nga agtugaw kadagiti public offices agsipud ta saanna nga ammo ti ibalbalikasna.
Impaganetgetna a saan dagitoy nga agbirbiruk iti lalaki agsipud ta prioridad dagitoy dagiti masakbayan dagiti annakda ken saanna nga ammo ti napasaran dagitoy rason a nagbalinda a solo parent.
Kabayatanna, nagpalagip daytoy kadagiti babbae a maab-abuso nga agturong kadagiti barangayda ken saanda nga agbuteng nga agipulong.
Kagiddan dayta, nagpalagip daytoy kadagiti kapadana a solo parent ken iti publiko a nasken a sukimaten dagitoy dagiti ibutosda a kandidato iti umadanin nga eleksyon.
Kinunana a dagiti pilien dagitoy ket dagiti mapagtalkan, dagiti makatulong iti pagsayaatan dagiti umili, nasken a sukimaten ti pudno nga ugalida, ti background dagitoy ken dadduma pay.
