IFUGAO- Manarimaan paylaeng ti search and rescue operation dagiti otoridad idiay Hucab, Kiangan Ifugao kalpasan a nalned ti 13-anyos a lalaki iti paset ti Pija River, Tattulao Hucab, Ifugao idi kalman, April 05, 2025.
Ti nasao a biktima ket residente metlaeng iti nasao a lugar.
Iti pannakiuman iti Bombo Radyo kenni PSMS Christopher Dulagan iti Kiangan Munisipal Police Station, kinunana a nagturung ti biktima ken dagiti kakadwana iti nasao a karayan tapno agdigus.
Nupay kasta, naiguyud ti biktima gapu iti napigsa nga ayus ti danum.
Maibasar iti inisyal nga imbestigasion dagiti otoridad, saan nga ammo ti biktima nga aglangoy.
Pinadas met ti kaduana nga ispal daytoy ngem gaputta marigatan ket inibbatanna.
Iti agdama, manarimaan paylaeng ti panangsapol dagiti otoridad a pakairamanan dagiti kameng ti MDRRMC, BFP, PNP dagiti sumagmamano a residente ken dadduma a maseknan nga ahensia iti nasao a lugar.
Mainaig iti dayta, inkari met ni PSMS Dulagan a saan dagitoy nga agsardeng agingga a masarakan ti bagi ti biktima.
Kabayatanna, inaklon ti nasao nga opisial a karit kadagitoy ti panagkurang dagiti equipment nangruna iti Oxygen tank nga aramaten dagiti divers nangruna ket mapattapatta a 10 meters ti kauneg ti napasamakan ti insidente.
Nagpalagip met ni PSMS Dulagan kadagiti indibiual nga agturong iti nasao a karayan nga agannadda kasta met a kidkiddawenna kadagiti nagannak a bantayanda dagiti annak dagitoy tapno maliklikan ti kapada nga insidente.//mp4
