Pinaglibakan ti pamilya ni Chinese-Filipino businessman Anson Que wenno paga-ammo kas Anson Tan dagiti alegasyon a daytoy ket konektado iti Philippine Offshore Gaming Operators (POGOs).
Iti statement nga inruar ti pamilya ni Que, impeksada nga awan ti anyaman a rental property dagitoy sadiay Bulacan.
Malaksid iti dayta, naiyunay-unay a dagiti negosyo ni Que ket lehitimo kasta met a miyembro daytoy iti Filipino Chinese business community ken paga-ammo daytoy kadagiti ado a charity works nga inar-aramidna.
Kiddaw ti nasao a pamilya iti publiko a saan dagitoy a mamatmati kadagiti palso a damag.
Kabayatanna, impasigurado dagitoy ti agtultuloy a kooperasyonda iti Philippine National Police nu pay kasta, umap-apelada iti panakaipaay ti privacy kadakuada para iti panagladingitda.
Maipalagip nga immunan nga impeksa ti Philippine National Police a manarimaan ti imbestigasyon dagitoy no adda ti kainaigan ti panakapapatay ni Que ken ti drayber daytoy iti Philippine Offshore Gaming Operators.
