Nangipaulog ti Commission on Elections (Comelec) idi Sabado ti palagip nga ipatungpalda ti “ayuda ban”, sangapulo nga aldaw sakbay ti eleksion inton Mayo a dose.
Sigun kenni Comelec Chairman George Garcia, maiparit ti aniaman a kita ti ayuda manipod Mayo a dos agingga a dose.
Ti ayuda ket maipapan ti cash assistance nga ipapaay ti gobierno a kas ti Assistance to Individuals in Crisis Situations (AICS), Tulong Panghanapbuhay sa Ating Disadvantaged/Displaced Workers (TUPAD), 4Ps, ken ti kontrobersial nga Ayuda para sa Kapos ang Kita Program (AKAP).
Kinunana ni Garcia a mangipilada ti reklamo iti siasinoman nga aglabsing iti pagannurutan.
Iti sidong ti Omnibus Election Code, dagiti panaglabsing kadagiti panangiparit ket buklen dagiti election offenses, a madusa iti pannakaibalud iti saan a nababbaba ngem maysa a tawen, ngem saan a nasursurok ngem innem a tawen, malaksid kadagiti dadduma pay a pannusa nga inted ti linteg.
