Nailista ti Bureau of Fire Protection-Baguio ti kaunaan nga uram wenno forest fire a nakairamanan ti agricultural land iti siudad ti Baguio.
Iti pannakiuman ti Bombo Radyo kenni Senior Fire Officer 3 Carlo Dicang, napasamak ti uram sadiay Lower Mangitit, Camp 7, Baguio City iti pasado alas onse ngem naitawag laeng daytoy iti opisinada iti 12:32 ti aldaw idi Abril 28,2025.
Nupay kasta, naideklara a fire out daytoy iti ala una y medya iti malem iti kapada nga aldaw.
Sigun kenni Senior Fire Officer 3 Dicang, dumanon iti agarup 500 square meter ti naapektaran wenno nauram nga area.
Impeksana pay a ti nauram ket agricultural area gaputa makita a nadalusan daytoy ngem nairaman ti kaabayna a saan pay a nadalusan.
Kinunana nga awan met ti nadanunan dagitoy a tao iti nakapasamakan ti nasao nga uram.
Impettengna metlaeng nga adda ti kalapaw sadiay a nakalukat ngem awan ti tao a nakitada.
Iti inisyal nga impormasyon ket mapapati a sakop wenno kukua daytoy ti Bases Conversion and Development Authority (BCDA) ngem adda ti mapapati nga agtagtagikua iti nasao a lote.
Manarimaan metten ti naan-anay nga imbistigasyon seknan iti nasao a banag.//Bombo Noveh Organo
