Guyguyuguyen ni Armed Forces of the Philippines Chief of Staff Gen. Romeo Brawner Jr., dagiti umili nga agbalin dagitoy kas modern heroes babaen iti nainsiriban a panagbutos dagitoy inton Mayo 12 National, Local, ken ti BARMM elections.
Sigun kenni Gen. Brawner, nasayaat no maaramat ti karbengan iti panagbotos wenno right to vote tapno makaipaay iti nasayaat a panagbalbaliw wenno pannakapasayaat dagiti ili wenno komunidad a pagnanaedan dagitoy.
Kinuna ni Brawner a saan nga agpaallilaw dagiti umili manipud kadagiti saan nga umiso nga impormasyon.
Mainaig iti dayta, kinunana a ti istorya ti pannakawayawaya ti Baguio ti mangparegta kadagiti umili nga agkaykaysada iti pananglagip kadagiti bannuar a nangted iti biagda iti napalabas a 80 a tawen.
Impettengna a saan nga agpatingga ti depensa ti pagilian idi 1945 gapu iti pannakawayawaya ti siudad ti Baguio.
Impeksa daytoy nga agtultuloy ti nasao a panangdepensa dagiti umili iti ili dagitoy iti tunggal desision nga aramidenda kas iti panagbotos kadagiti “right candidates”.
Maipalagip nga idi Abril 27, 1945 ket naideklara ti panakawayawaya ti siudad ti Baguio manipud kadagiti Hapon idi World War II.
Daytoy ket babaen iti tulong dagiti Amerikano.
