Agtultuloy a maim-imbestigaran ti naangay a Cordillera Peoples Alliance (CPA) a naipatungpal iti siudad ti Baguio itay nabiit a nakipasetan dagiti 17 a menor de edad manipud Sanafe, Lamut, Ifugao.
Iti pannakiuman ti Bombo Radyo kenni Police Lieutenant Jennifer Baguidubol, Public Information Officer ti Ifugao Police Provincial Office, kinunana a rumbeng a maimbistigaran daytoy gaputa adda ti nilabsing dagitoy a linteg.
Kinuna a maipatpatungpal ti imbestigasyon tapno maamuan no siasino ti accountable iti daytoy.
Sigun kenkuana, nagdanag dagiti nagannak dagiti ubbing gaputa awan ti aniaman a pammalubos dagitoy a makipaset dagiti annakda iti nasao a seminar.
Gapu iti dayta, nagreport dagitoy kadagiti maseknan nga otoridad rason a nakikoordinar met dagitoy kadagiti otoridad iti siudad ti Baguio para iti rescue operation.
Dagus met a kinuyog dagitoy dagiti otoridad sadiay Ifugao rason a balligi a naiyawid dagiti nasao nga ubbing kadagiti bukodda a pagtaengan.
Iti agdama, nasayaat metten ti kasasaad dagitoy.
Kabayatanna, nagpalagip ni Baguidubol iti publiko, kadagiti organizers a rumbeng nga adda ti pammalubos wenno parent consent a maipaay kadagiti nagannak dagiti menor de edad no adda man dagiti kapada a programa.
Malaksid iti dayta, mapalpalagipan metlaeng dagiti ubbing a rumbeng nga agpakada a nalaing dagitoy kadagiti nagannakda tapno saan dagitoy nga agdanag.
