Kiddaw ni Mike Cabangon, dadaulo iti Kilusang Mayo Uno-Cordillera kenni President Ferdinand Marcos Jr. a sertipikaranna kas urgent ti gakat a mangisingasing a maipangato iti P200 ti inaldaw a minimum wage dagiti mangmangged.
Daytoy ket kas kagiddan iti panakarambak ti Labor Day inton bigat a mabalin a naimbag a damag kadagiti mangmangged.
Iti panakiuman ti Bombo Radyo kenni kenni Cabangon, kinunana a naituding a mangisayangkat ti Kilusang Mayo Uno iti programa inton bigat, Labor Day sadiay Igorot Garden, Burnham Park seknan iti nagduduma a pakaseknan dagiti mangmangged nangruna iti nababa a sueldo wenno saan nga umno a sueldo.
Kinuna ni Cabangon a maipatungpal ti ababa a programa iti oras ti alas singko ti malem no sadino al-allukoyenna ti publiko a makipaset iti daytoy.
Sigun kenni Cabangon, saan nga umdas ti P470 a sueldo dagiti mangmangged inaldaw nangruna ket ado dagiti pag-gastusan ti maysa nga indibidual kas iti transportasyon, dagiti necessity kas iti load, ti taraon ken daduma pay.
Gapu iti dayta, awan ti mabati iti nasao a sueldo a maipaay met iti pagkasapulan dagiti pamilya dagitoy.
Daytoy ti rason no apay nga isaksakadda ti P1200 national minimum wage gapu ta kas maibasar iti panagadal dagiti eksperto ket daytoy ti makabiyag a sueldo ken ti P470 a sueldo ket mabigbigbig kas “sahod alipin.”
Kabayatanna, manarimaan met ti panagpapirma dagitoy iti petisyon maipapan iti panakaisakad ti P1200 national minimum wage gapu ta daytoy ti makitkitada a makatulong kadagiti amin a Pilipino.
