Nangiruar ti komento ti grupo a Catholic bishops ti Pilipinas maipapan iti clerical sexual abuse, a mangidepdepensa kenni Cardinal Luis Antonio Tagle sumangmamano nga aldaw sakbay ti pannakalukat ti “conclave” a mangbutos iti baro a Santo Papa.
Nagpakdaar ti Watchdog group a BishopAccountability.org a saan a mabalin nga ag-rely ken da Tagle ken Italian Cardinal Pietro Parolin seknan iti panangsalaknib kadagiti ubbing.
Agpada a maibilbilang gamin a frontrunner dagiti nasao a kardinal a mangsukat kenni Pope Francis.
Agdama nga adda idiay Vatican dagiti kardinal manipud iti intero a lubong, sakbay ti conclave inton Mierkoles dagiti maikari kadakuada a mangbutos iti baro a Santo Papa.
Sigun iti Catholic Bishops Conference of the Philippines (CBCP), ti panangrisut kadagiti alegasion ket saan a karbengan dagiti “clergy”, ken kinunana nga adda kadagiti bukod nga diocesan wenno religious superiors ti sungbat, ken saan kenni Tagle.
Sipud idi nadutukan iti full-time position iti Roman Curia, saanen nga iggem ni Cardinal Tagle ti otoridad iti diocese iti Pilipinas.
Daytoy ket kalpasan a kinuna ni Anne Barrett Doyle, co-director ti BishopAccountability.org a saan pay a naipablaak iti webpage ti Manila archdiocese dagiti pagannurotan a mangrisut kadagiti sexual abuse cases.
Para kenni Doyle, nu saan a kabaelan a kiddawen ni Cardinal Tagle iti kabsatna a mangipablaak kadagiti pagannurotan, ania ti manamnama kenkuana nu maragpatna ti kina-Santo Papa iti simbaan a Katolika.
