Nailatang ti P3 million para iti delegasyon ti Rehiyon Cordillera iti umadanin a Palarong Pambansa 2025.
Iti interview ti Bombo Radyo kenni Edgar Madlaing-Sports Coordinator ti Department of Education-Cordillera, kinunana a maaramat daytoy para iti travel ken meal allowance, uniporme, training ken dadduma pay.
Nupay kasta, kinunana nga agdawdawat pay dagitoy iti kanayunan a P1 million agsipud ta agkurang ti immunan a naipaay kadakuada.
Naituding met ti coordination meeting dagitoy sadiay Laoag inton Mayo 8, tapno mapagtatalantanan dagiti kanayunan pay a pagkasapulan iti nasao nga ay-ayam.
Innayonna pay a mabalin nga umawat dagitoy iti donasyon agingga a malpas ti umadanin nga eleksyon.
Iti baet dayta, agyamyaman daytoy kadagiti agtultuloy a mangsupsuportar kadakuada nangruna kadagiti atleta.
