Impasigurado ni PLTCOL. Daniel Pel-ey, Public Information Officer iti Police Provincial Office-Abra ti seguridad dagiti umili sadiay Abra inton eleksyon kasaruno dagiti nailista dagitoy a shooting incidents.
Iti pannakiuman ti Bombo Radyo kenkuana,kinunana nga addan dagiti nakadeploy a police personnels a nagtaud manipud kadagiti nagduduma a yunit ti pulisya iti rehiyon Cordillera nga agbantay iti intero a probinsya.
Namnamaenna pay nga adda dagiti tumulong a personnel manipud iti Philippine Army bayat nga adda met dagiti dua nga election observers manipud iti European Union nga ag-obserbar sadiay inton eleksyon.
Sigun kenkuana, mabuteng dagiti umili sadiay a rumuar inton eleksyon gapu paylaeng kadagiti napasamak a pammaltog sadiay.
Nupay kasta, kinunana nga awan ti rumbeng a pagdanagan dagitoy gaputa full forced ti panagbantay dagitoy.
Impasiguradona pay nga aramiden dagitoy ti kabaelenda tapno maipasigurado ti linak ken kappia iti intero a probinsya.
Innayonna pay nga addan dagiti agbanbantay kadagiti election paraphernalia a maaramat inton eleksyon.
Kabayatanna, nagpalagip manen daytoy kadagiti umili sadiay a makitinnulongda kadakuada nangruna no adda ti maobserbaran dagitoy a saan a nasayaat no sadino mabalinda laeng nga itawag daytoy iti opisinada.
Kiddawna metlaeng kadagiti kandidato a rumbengda a suruten ti pagalagadan ti Commission on Elections tapno mapagtalinaed ti linak ken kappia bayat ken kalpasan ti eleksyon.
