Idagdagadag ti maysa a senador ti panangrepaso kadagiti naisingasing a baro a programa a mangkessay ti senior high curriculum, a mangipapaay ti “electives on demand.”
Sigun kenni Senate Committee on Basic Education chairperson Sherwin Gatchalian, rumbeng a maaramid iti kabiitan a panawen ti komprehensibo a panangrepaso iti naisingasing a pannakakessay dagiti track ti senior high school (SHS) ken panangipaay ti “electives on demand” tapno maipasigurado nga awan ti pagkurangan iti nagbaetan ti basic education ken higher education.
Kinuna ti nasao a senador a napateg ti mapasamak a panagrepaso gaputa dagiti baro a kurikulum ti SHS a naikeddeng a maipatungpal kadagiti napili a publiko ken pribado a pagadalan a mangrugi iti School Year 2025–2026 ket mangitampok iti pannakaaramid manen iti programa a kas ti pannakakessay ti Senior High School tracks manipod iti uppat nga agbalin a dua— ti Academic ken Technical-Professional tracks, kasta met ti panangkessay ti bilang dagiti majro subjects.
Inkalintegan ti mammanday-linteg nga uray no mangala dagiti estudiante iti “electives,” mabalin a saanda latta a nakasagana iti kolehio gapu iti “resource limitations” dagiti pagadalan.
