Ngumatngaton ti bilang dagiti indibidual a “malnourished” idiay Gaza, sigun iti maysa nga opisial ti World Health Organization idi kalman.
Malaksid iti dayta, dandani payen a maibus dagiti agas a maar-aramat ken agtultuloy a mapaspasaran metlaeng ti panagbisin.
Daytoy ket kalpasan a linapdan ti Israel ti suplay sipud pay idi Marso idi rinugian ti Israel ti “devastating military campaign” kontra iti militante a grupo ti Hamas.
Sigun kenni WHO representative for the Occupied Palestinian Territory Rik Peeperkorn, naimatanganna dagiti ubbing a kasla ub-ubing iti tawenda ngem iti edadda ken simmarungkar iti ospital iti amianan ti Gaza a sadiay nasurok a 20% kadagiti ubbing a na-screen ti nagsagaba iti nakaro a malnutrision.
Sigun met iti dadaulo ti UN Palestinian refugee agency a ni Philippe Lazzarini, linapdan ti Israel dagiti taraon ken tulong kadagiti sibilian kas armasda iti gubat.
Maulit-ulit a pabpabasulen ti Israel ti Hamas gapu iti panangpataudna iti bisin babaen ti panangtakawna iti tulong a nairanta a para kadagiti sibilian, ngem inlibak ti Hamas ti alegasion.
