Narisut ti municipal board of canvassers (MBOC) sadiay Solano, Nueva Vizcaya ti “tie” a kandidato nga agtartaray para iti senior municipal councillor (number 1 spot) babaen ti coin toss.
Ni Clifford Tito, maysa nga optometrist, ken ni Thomas Dave Santos, maysa a negosiante, ti nakagun-od iti kangatuan a bilang ti botos para iti puesto, a tunggal kandidato ket nakaawat iti 1,351 a botos bayat ti midterm election idi Lunes.
Agpada a nagtaray dagiti kandidato para iti posision iti umuna a gundaway.
Napno ti MBOC venue iti panagrag-o ken ragsak kagiddan ti “banter” dagiti dua a municipal-elects no siasino ti rumbeng a mangted iti dalan, agingga a naikeddeng a ti coin toss ti mangrisut iti nasao a banag.
Sigun iti Comelec, ti “tie” iti elections ket mabalin a marisut babaen iti “drawing of lots,” ken “coin tosses.”
Iti kamaudianna, ni Santos nga agtawen 27 ti nangabak iti toss coin.
Iti agdama, ni Santos ket mabigbigbig a kaubingan a municipal councilor iti ili ti Solano, naabakna ti 21 pay a kandidato para iti kangatuan a puesto.
