Pormal nga inwaragawag ti baro a South Korean President a ni Lee Jae-myung ti umuna a batch ti gabinete daytoy kalpasan a naiproklama a presidente iti nasao a pagilian.
Iti pannakiuman ti Bombo Radyo kenni Ruel Toquero, Bombo International News Correspondent sadiay South Korea, kinunana a dagiti nainominar iti nagduduma a takem ket pakairamanan da Rep. Kim Min-seok kas prime minister, sigud nga Unification Minister Lee Jong-seok kas director iti National Intelligence Service (NIS).
Malaksid iti dayta, napili metlaeng da Rep. Kang Hoon-sik kas presidential chief of staff, sigud nga Ambassador Wi Sung-lac kas director iti Office of National Security, retired Army Gen. Hwang In-kwon kas dadaulo ti presidential security service, kenni Rep. Kang Yu-jung kas presidential spokesperson.
Napili dagitoy kas maibasar iti kapadasan, kapasidad ken ti kabaelanda.
Maipalagip a nagsapata ni Lee Jae-myung kas baro a presidente kalpasan a nag-concede ti kalabanna a Kim Moon-soo iti People Power party.
Kagiddan dayta, innayon ni Toquero a namnamaen dagiti umili sadiay a ni laeng sigud nga impeached President Yoon Suk Yeol ti maudi a na-impeached sadiay kasta metlaeng ti panagkaykaysa ti intero a South Korea.
