Impasigurado ti United Nations a suportaranna ti gobierno ti Pilipinas iti panangrisut ti panagadu ti kaso ti HIV kadagiti agtutubo a Pilipino.
Daytoy ket kalpasan a nakailista ti maseknan nga ahensia iti 500% a panagadu ti kaso ti nasao a sakit.
Inyekbas ni Arnaud Peral, United Nations Resident Coordinator iti Pilipinas, ti pakaseknanna iti makapaalarma a panangngato ti HIV infections, nangruna kadagiti indibidual nga agtawen ti 15 agingga iti 25.
Maibasar iti datos ti Department of Health, nasurok 6,700 a baro a kaso ti HIV ti nairekord manipod idi Enero agingga idi Abril, 2025.
Aklonen ni Peral a limitado ti maipapaay a pondo ngem impaganetgetna nga umaw-awat ti Pilipinas ti suporta babaen iti mekanismo a kas ti Global Fund.
Kabayatanna, kiniddawen ti Department of Health kenni President Ferdinand “Bongbong” Marcos Jr. tapno ideklara ti national public health emergency babaen ti panangdakamatda a ti Pilipinas ti addaan ti kangatuan a bilang ti baro a kaso ti HIV iti Western Pacific region.
