Impetteng ni Baguio City Mayor Benjamin Magalong a maysa ti siudad ti Baguio kadagiti napeggad a lugar nangruna iti panawen ti panagtutudo.
Sigun kenkuana, no kitkitaen iti hazard map wenno iti geologic hazard map ket manmano laeng ti makita a saan a maikonsidera a hazard areas.
Kinunana a kadawyan kadagiti areas a masakupan ti siudad ket nalabaga dagitoy.
Impetteng pay ti mayor nga adda dagiti sinking areas, flood prone areas, landslide prone areas ken agarup uppat a faults iti siudad kas ti Mirador, San Vicente, Loakan, ken Burnham Park.
Malaksid iti dayta, adda pay dagiti uppat a fault a mabalin a mang-apektar iti seismis activity kas ti San Manuel, Tuba, Tebbo, ken Digdig.
Ti Digdig fault ket maysa kadagiti main contributor iti napasamak a ginggined idi tawen 1990 a nakatayan dagiti adu nga inidibidual a pakairaman ti siudad ti Baguio.
Gapu iti dayta, daytoy ti maysa a rason tapno ad-adda a tutukoan dagitoy ti panagsagana ken panagresponde.
Nupay kasta, innayon ti mayor a dakkel a tulong ti pannakaimuntar dagiti CCTV kadagiti lugar a makitkita a hazardous tapno mabantayan dagitoy kasta metten dagiti flood warning systems.
