Pinapanaw ti National Unity Party ni Deputy Speaker ken Cebu 5th District Representative Vincent Franco “Duke” Frasco gapu iti panagkedkedna a mangsuporta iti agtultuloy a panagtalinaed ni Martin Romualdez kas Speaker ti House of Representatives.
Iti maysa a statement, kinuna ni National Unity Party president ken Camarines Sur 2nd District Representative LRay Villafuerte a ti “unilateral decision” ni Frasco ket nalawag a panaglabsing iti posision ti National Unity Party a suportaran ti agdama a House Speaker tapno agtalinaed daytoy iti puestona iti sumaruno a Kongreso.
Sigun kenni Villafuerte, rumbeng a napagsaritaan kuma paylaeng ti takderna iti liderato ti NUP, imbes nga ipablaakna iti publiko ken salungasingenna ti unanimous decision ti nasao a partido.
