Innem ti pimmusay a Palestinian ken adu a dadduma pay ti nadangran kalpasan a pinalpaltugan dagitoy ti puersa ti Israel nga asideg iti maysa nga aid distribution center iti abagatan a paset ti Gaza, sigun iti Hamas-run Civil Defence agency.
Napasamak ti insidente idi kalman ti agsapa, bayat nga aguumong dagiti tattao tapno mangala ti suplay ti taraon.
Sigun iti pannakangiwat ti Civil Defence, pinaltugan ida dagiti Israeli idi pinadas dagiti tattao ti agtitinnulong tapno maka-asideg iti lugar.
Sigun iti Israeli military, nangisayangkatda laeng ti warning shots kontra kadagiti suspek a nangpadas nga umasideg kenkuada bayat nga agpangpangta dagitoy.
Nagdesision met ti Gaza Humanitarian Foundation (GHF), a tumulong iti operasion, nga isardeng paylaeng ti panangiwaras kadagiti suplay ti taraon tapno mapasayaat ti seguridad ken maliklikan ti sobra nga adu ti tao.
Immunan a nagballaag ti Israel Defense Forces (IDF) kadagiti tattao idiay Gaza a ti lugar ket maysa nga aktibo a combat zone nangruna iti rabii.
Iti agdama, nasurok 54,880 a Palestine civilian ti pimmusay manipod idi nagrugi ti giyera idiay Gaza, kas maibasar iti kaudian a datos ti Ministry of Health ti Gaza.
