Imbalud ti US Immigration and Customs Enforcement (ICE) ni Khaby Lame, maysa kadagiti mabigbigbig wenno nalatak iti social media platform a TikTok kas maysa a content creator, kalpasan a mapapati a nag-over stay idiay Estados Unidos.
Sigun iti ICE, ni Lame ket natiliw idi Hunio 6 iti Harry Reid International Airport idiay Las Vegas, Nevada, ngem nawayawayaan metlaeng iti agpada nga aldaw ken napatgan a pumanaw idiay Amerika.
Naamuan a nakadanon ni Lame iti Estados Unidos idi Abril 30, ngem mapapati a limmampas ti naikeddeng nga aldaw a panagtalinaedna idiay Estados Unidos ngem sigun kadagiti otoridad, pimmanaw metlaeng ni Lame iti pagilian.
Maipalagip a naam-ammo ni Lame iti natalna ngem nakakatkatawa a TikTok videos daytoy a mangbabalaw kadagiti kumplikado a “life hacks.”
Addaan daytoy iti nasurok 162 milion followers ken mapatta-patta a dumanon iti $16.5 million ti maal-alana manipod kadagiti endorsements iti nagbaetan ti Hunio 2022 ken Setiembre 2023, sigun iti Forbes.
Iti baet ti insidente, awan pay ti inruar a komento ni Lame iti social media accounts-na.
