Bambatayan ita ti Smoke Free Task Force dagiti 52 nga illegal online sellers nga agilaklako iti vape iti siudad ti Baguio.
Iti pannakiuman ti Bombo Radyo kenni Joshua Daniel Rivera, Communications Development Officer ti Smoke Free Task Force, kinunana a nabigbig dagitoyen idi napalabas a tawen babaen iti panagregget dagitoy.
Immunan a naduktalan a dagitoy nga online sellers ket naammuan nga agilaklako babaen iti facebook page ken iti metlaeng mismo a social media account dagitoy.
Sigun kenkuana, dagiti agilaklako iti daytoy ket babaen iti errands wenno ibatbatida mismo kadagiti dropping centers dagitoy wenno saan ket dagitoy mismo ti makipagsarak kadagiti costumer-da.
Kinunana a naipakaammo metten ti listaan dagiti illegal online sellers iti Baguio City Police Office para iti pannakaarestar dagitoy.
Nupay kasta, saan a kas karina a matiliw dagitoy gaputa iti uneg ti pagtaenganda nga agilaklako dagitoy rason a makikikoordinarda kadagiti pulis.
Iti baet dayta, innayonna nga agbirbiruk dagitoy iti dadduma a pamay-an tapno makemmeg dagiti nasao nga indibidual.//Bombo Noveh Organo
